Baydhabo: Guddiga Doorashooyinka oo bilaabay qabashada araajida musharraxiinta Hoggaamiyaha Koonfur Galbeed waxaana socda loolan xoogan ee ah kursiga ugu sareeya KGS.
Magaalada Baydhabo, xarunta ku-meel-gaarka ah ee Dowlad-goboleedka Koonfur Galbeed Soomaaliya, ayaa maanta si rasmi ah looga bilaabay diiwaangelinta iyo qabashada araajida musharraxiinta u tartamaya xilka Hoggaamiyaha Dowlad-goboleedka Koonfur Galbeed, kaddib markii uu sidaas ku dhawaaqay Guddiga Madaxa-bannaan ee Doorashooyinka iyo Soohdimaha Qaranka.
Tallaabadan ayaa qeyb muhiim ah ka ah geeddi-socodka doorashooyinka ka socda Koonfur Galbeed Soomaaliya, iyadoo lagu wado in maalmaha soo socda la soo gabagabeeyo diiwaangelinta musharraxiinta, ka hor inta aan loo gudbin marxaladaha kale ee ololaha iyo doorashada hoggaanka maamulka.
Maalmo ka hor ayay Baydhabo martigelisay doorashada Guddoonka Baarlamaanka Koonfur Galbeed Soomaaliya, taas oo loo arkay mid gogol xaar u ah qabsoomidda doorashada hoggaamiyaha maamulka. Doorashada guddoonka baarlamaanka ayaa si weyn isha loogu hayay maadaama ay qeyb ka tahay dhismaha hay’adaha sharci-dejinta ee maamulka Koonfur Galbeed.
Mas’uuliyiinta dowladda iyo guddiyada doorashooyinka ayaa sheegay in doorashadan lagu wado inay ku dhacdo hab waafaqsan shuruucda iyo nidaamyada la dejiyay, iyadoo la qorsheynayo in la doorto hoggaamiyaha cusub ee Koonfur Galbeed Soomaaliya maalmaha soo socda.
Doorashadan ayaa ah mid si gaar ah muhiimad ugu leh shacabka ku nool deegaannada Koonfur Galbeed, kuwaas oo muddooyinkii dambe wajahaya caqabado dhinacyada amniga, horumarinta adeegyada bulshada, dib-u-heshiisiinta bulshada iyo xoojinta dowladnimada deegaanka. Hoggaamiyaha la doorto ayaa laga filayaa inuu mudnaan siiyo arrimaha amniga, dib-u-dhiska kaabeyaasha dhaqaalaha, horumarinta waxbarashada iyo caafimaadka, iyo sidoo kale xoojinta wada-shaqeynta dowladda federaalka iyo dowlad-goboleedyada kale.
Dhanka kale, doorashooyinkan ayaa ku soo aadaya xilli Soomaaliya ay weli ka taagan yihiin dooddo siyaasadeed iyo aragtiyo kala duwan oo la xiriira hannaanka doorashooyinka dalka. Qaar ka mid ah siyaasiyiinta mucaaradka iyo daneeyayaasha siyaasadda ayaa weli muujinaya walaac ku saabsan habraacyada doorashooyinka iyo qaabka loo maamulayo geeddi-socodka siyaasadeed ee dalka.
Si kastaba ha ahaatee, Dowladda Federaalka Soomaaliya ayaa ku adkeysaneysa in doorashooyinka ka socda dalka ay ku socdaan jadwalkii iyo qorshihii loo dejiyay, iyadoo sheegtay inay ka go’an tahay hirgelinta nidaam doorasho oo ballaaran oo shacabka Soomaaliyeed ay door muuqda ku leeyihiin.
Indhaha siyaasadda Soomaaliya ayaa haatan ku soo jeeda Baydhabo, halkaas oo la filayo in maalmaha soo socda ay ka dhacaan dhaq-dhaqaaqyo siyaasadeed iyo ololayaal ay sameynayaan musharraxiinta doonaya inay hoggaanka Koonfur Galbeed qabtaan. Natiijada doorashadan ayaa la filayaa inay saameyn ku yeelato jihada siyaasadeed ee maamulka Koonfur Galbeed iyo doorka uu ku leeyahay geeddi-socodka siyaasadeed ee guud ahaan Soomaaliya.
Dadka deegaanka iyo daneeyayaasha siyaasadda ayaa rajeynaya in doorashadu ku dhacdo jawi nabdoon, hufan oo daahfuran, isla markaana ay horseeddo xasillooni siyaasadeed, midnimo iyo horumar waara oo ka hanaqaada deegaannada Koonfur Galbeed Soomaaliya.
Dalka waxaa ka socda Doorashooyinka Qof iyo Codka ah Mucaaradku waa qaadaceen Doorashooyinkan.
