Hiiraan/Shabeellaha Dhexe 6 Agoosto 2026: Wararka ay heshay DunidaMaanta.com ayaa sheegaya in dagaal beeleed xooggan uu mar kale dib uga qarxay deegaanno dhaca xadka u dhexeeya gobollada Hiiraan iyo Shabeellaha Dhexe, kaddib maalmo ay halkaasi ka taagneyd xiisad colaadeed.
Dagaalka oo galay maalintii saddexaad ayaa maanta si gaar ah uga dhacay deegaanka Galcad, oo ku dhow deegaanka Ceelbaraf, halkaas oo weli ay gacanta ku hayaan maleeshiyaadka Al-Shabaab. Ilo deegaanka ku sugan ayaa u sheegay DunidaMaanta.com in labada maleeshiyo beeleed ay isku adeegsadeen hub culus iyo mid fudud, taasoo sababtay khasaare dhimasho iyo dhaawac leh.
Wararka hordhaca ah ee laga helayo goobaha lagu dagaallamay ayaa tilmaamaya in ugu yaraan 10 qof ay ku dhinteen iska horimaadka maanta, kuwaas oo intooda badan ka tirsan dhinacyada dagaallamaya. Sidoo kale waxaa jira tiro dhaawacyo ah, inkastoo aan weli si rasmi ah loo xaqiijin tiradooda, maadaama ay adag tahay in xog sax ah laga helo goobaha ay colaaddu ka socoto.
Goobjoogayaal ayaa sheegay in xaaladda deegaanka ay weli tahay mid aad u kacsan, iyadoo labada dhinac ay helayaan gurmadyo ciidan iyo maleeshiyaad ka kala imanaya gobollada Hiiraan iyo Shabeellaha Dhexe. Arrintan ayaa sare u qaadday cabsida laga qabo in dagaalku sii fido, isla markaana uu saameyn ku yeesho deegaanno kale oo ku dhow halka uu ka socdo.
Dadka rayidka ah ee ku nool deegaannada u dhow goobaha lagu dagaallamayo ayaa la soo sheegayaa inay bilaabeen inay ka barakacaan guryahooda, iyagoo ka baqaya in dagaalku sii xoogeysto. Wararka deegaanka ayaa sidoo kale tilmaamaya in dhaq-dhaqaaqyo hubeysan ay weli ka socdaan aagga, taasoo muujinaysa in halista dagaalku aysan weli dhammaan.
Dhanka kale, waxaa socda dadaallo nabadeed oo ay hormuud u yihiin odayaasha dhaqanka, culimada iyo waxgaradka labada beelood, kuwaas oo ku howlan sidii xabbad-joojin degdeg ah loo gaari lahaa, loogana hortagi lahaa in colaaddu sii daba dheeraato. Ilo ku dhow dadaalladaasi ayaa sheegay in la wado wada-hadallo lagu doonayo in lagu dejiyo xiisadda, inkastoo aan weli laga gaarin heshiis rasmi ah.
Ilaa iyo hadda, maamulka HirShabeelle kama uusan soo saarin wax war rasmi ah oo ku saabsan dagaalka dib uga qarxay xadka gobollada Hiiraan iyo Shabeellaha Dhexe. Sidoo kale, lama shaacin tallaabooyin amni oo lagu kala dhexgelinayo dhinacyada dagaallamaya.
Deegaannada ku teedsan xadka Hiiraan iyo Shabeellaha Dhexe ayaa sanadihii u dambeeyay marar badan martigeliyay dagaallo beeleedyo soo noqnoqday, kuwaas oo sababay khasaarooyin isugu jira dhimasho, dhaawac iyo barakac dad rayid ah. Inkastoo marar kala duwan la isku dayay heshiisiin iyo waanwaan, haddana colaadahaasi ayaa marar badan dib u soo noqnoqday.
DunidaMaanta.com waxay si dhow ula soconaysaa xaaladda, waxayna akhristayaasheeda la wadaagi doontaa wixii warar iyo faahfaahin cusub ah ee kasoo kordha dagaalkan marka ay soo baxaan.
