Muqdisho Agoosto 10 2026: Guddoomiyaha Guddiga Madaxa-bannaan ee Doorashooyinka Qaranka iyo Soohdimaha, Mudane Cabdikariin Axmed Xasan, ayaa kulan xog-wadaag ah la qaatay xubnaha beesha caalamka.
Guddoomiyaha waxaa kulanka ku weheliyay Komishaneer Cabdi Cadow, Komishaneer Maxamed Amiin Xasan iyo Xoghayaha Guud ee Guddiga, Xuseen Nuunow Cali.
Kulanka ayaa looga hadlay arrimaha doorashooyinka iyo horumarka laga sameeyay geeddi-socodka doorashooyinka qof iyo cod ee Soomaaliya.
Safiirrada iyo hay’adaha caalamiga ah oo kulanka ka qeyb galay
Kulanka xog-wadaagga ah waxaa goobjoog ka ahaa safiirrada dalalka Mareykanka, Boqortooyada Ingiriiska, Shiinaha, Turkiga, Itoobiya, Kenya, Suudaan iyo Masar.
Sidoo kale, waxaa kulanka ka qeyb galay xubno ka socday hay’ado caalami ah, kuwaas oo ay kamid yihiin Qaramada Midoobey, Midowga Afrika iyo Ururka Iskaashiga Islaamka.
Intii uu socday kulanka, waxaa si gaar ah looga hadlay arrimaha doorashooyinka iyo tallaabooyinka laga qaaday geeddi-socodka doorashooyinka dalka.
Guddiga oo ka warbixiyay doorashooyinkii qabsoomay
Guddoomiyaha Guddiga Madaxa-bannaan ee Doorashooyinka Qaranka iyo Soohdimaha, Cabdikariin Axmed Xasan, ayaa khudbad ka jeediyay kulanka.
Ugu horreyn, Guddoomiyaha ayaa ka warbixiyay waxyaabihii u qabsoomay Guddiga iyo shaqada laga qabtay geeddi-socodka doorashooyinka.
Wuxuu si gaar ah u xusay doorashooyinkii Golaha Deegaanka ee ka qabsoomay Gobolka Banaadir.
Sidoo kale, wuxuu ka hadlay doorashooyinkii isku sidkanaa ee Golaha Deegaanka iyo Golaha Wakiillada ee ka qabsoomay Dowlad Goboleedka Koonfur Galbeed iyo Galmudug.
Waxaa sidoo kale kulanka lagu soo hadal qaaday doorashooyinka isku sidkan ee la qorsheeyay inay ka qabsoomaan Dowlad Goboleedka Hirshabeelle.
Qof iyo cod oo laga hadlay
Guddoomiye Cabdikariin Axmed Xasan ayaa sheegay in geeddi-socodka doorashada qof iyo cod uu si wanaagsan uga hirgalay dalka.
Wuxuu tilmaamay in geeddi-socodkaasi uu shacabka Soomaaliyeed siinayo fursad ay ku doortaan wakiilladooda siyaasadeed ee heerarka kala duwan.
Sida uu Guddoomiyuhu sheegay, dadka Soomaaliyeed ayaa muddo ku dhow 57 sano kadib helaya fursad ay ku doortaan wakiilladooda.
Beesha caalamka oo soo dhaweysay horumarka
Dhankooda, safiirrada iyo wakiillada beesha caalamka ee kulanka ka qeyb galay ayaa su’aalo iyo hadallo ka jeediyay kulanka.
Waxay soo dhaweeyeen horumarka laga sameeyay geeddi-socodka doorashooyinka qof iyo cod ee Soomaaliya.
Sidoo kale, waxay xaqiijiyeen inay taageerayaan dadaallada lagu xoojinayo hannaan dimuqraadi ah oo awoodda doorashada dib loogu celinayo shacabka Soomaaliyeed.
Wakiillada beesha caalamka ayaa sidoo kale sheegay inay Guddiga kala shaqeynayaan hirgelinta doorashooyin loo dhan yahay, hufan oo lagu kalsoonaan karo.
Kulanka ayaa kusoo dhammaaday xog-wadaag ku saabsan xaaladda iyo horumarka geeddi-socodka doorashooyinka, iyadoo Guddiga Doorashooyinka Qaranka uu beesha caalamka la wadaagay warbixin ku saabsan shaqadii uu qabtay iyo doorashooyinkii horey uga qabsoomay qaar ka mid ah maamul goboleedyada dalka.
