Sheekh Shariif iyo Kolonyadiisii oo loo Fasaxay inay Galaan Hoygiisa Kadib Xanibaad Kooban oo Muqdisho Ka Dhacday Xanibaadan ayaa timid daqiidado ka dib markii ka soo baxay Mirinaayo oo ah halkii Dagaalka uu ku galay.
Muqdisho: Waxaa la fasaxay Madaxweynihii hore ee Soomaaliya Sheekh Shariif Sheekh Axmed iyo kolonyadii gaadiidka ahayd ee la socotay, kadib markii muddo ku dhow hal saac lagu hakiyey gudaha magaalada Muqdisho, gaar ahaan aagga Gobolka Banaadir.
Sida ay xogta ku heshay Warbaahinta Dunida Maanta, Sheekh Shariif ayaa kusii jeeday guriga uu ka degan yahay aagga Garoonka Diyaaradaha Aadan Cadde ee Muqdisho, kadib markii uu ka soo baxay deegaanka Mirinaayo ee Degmada Cabdicasiis, halkaas oo saacadihii hore ay ka dhacday iska horimaad iyo xiisad u dhexeysay ciidamada dowladda iyo ciidamo ilaalo u ahaa mas’uuliyiin ka tirsan mucaaradka.
Wararka la helayo ayaa sheegaya in sababta loo hakiyey kolonyada Sheekh Shariif ay la xiriirtay tirada badan ee gaadiidka dagaalka iyo ciidamada dheeraadka ah ee la socday. Dowladda Federaalka Soomaaliya ayaa muddooyinkii dambe wadday dadaallo lagu xadidayo hubka culus iyo gaadiidka dagaalka ee ay adeegsadaan siyaasiyiinta mucaaradka iyo mas’uuliyiinta hore ee dowladda, si loo adkeeyo amniga caasimadda Muqdisho.
Goob-joogayaal ayaa sheegay in ciidamada ammaanka ay baaritaanno dheeraad ah ku sameeyeen kolonyada, iyadoo muddo kooban la hakiyey dhaq-dhaqaaqii gaadiidka halkaasi marayay. Intii ay socotay xanibaadda, waxaa jiray dadaallo lagu doonayay in xaaladda lagu xalliyo wada hadal iyo isfaham, si looga fogaado in xiisaddu sii kororto.
Sida ay wararku tilmaamayaan, Taliyaha Ciidamada Xoogga Dalka Soomaaliyeed iyo Guddoomiyaha Maxkamadda Ciidamada Qalabka Sida ayaa qeyb ka ahaa dadaallada lagu dejinayay xaaladda. Labada mas’uul ayaa la socday Sheekh Shariif markii uu ka soo baxay guriga Mirinaayo, waxayna door muuqata ka qaateen wada hadalladii lagu dhammeeyey muranka ka dhashay hakinta kolonyada.
Kadib wada hadallo socday muddo kooban, waxaa lagu guuleystay in xal laga gaaro arrinta, iyadoo ugu dambeyn loo oggolaaday Sheekh Shariif iyo ciidamadii la socday inay sii wataan socdaalkooda kuna laabtaan hoygiisa ku yaalla aagga Garoonka Diyaaradaha.
Xaaladda guud ee goobta ayaa hadda ah mid degan, waxaana dib u bilowday isku socodkii gaadiidka iyo shacabka ee halkaasi. Ma jiraan warar sheegaya khasaare ka dhashay hakinta kolonyada ama iska horimaad cusub oo dhacay intii ay arrintu socotay.
Dhacdadan ayaa ku soo beegmaysa xilli ay Muqdisho ka jiraan dhaq-dhaqaaqyo siyaasadeed iyo kulamo ay wadaan siyaasiyiinta mucaaradka iyo madax hore, kuwaas oo si dhow ula socda xaaladda siyaasadeed iyo amni ee dalka. Dowladda Federaalka Soomaaliya ayaan weli si rasmi ah uga hadlin faahfaahinta hakinta kolonyada Sheekh Shariif, hase yeeshee ilo amni ayaa sheegaya in tallaabadaasi ay qayb ka ahayd nidaamyo amni oo lagu xakameynayo hubka iyo gaadiidka dagaalka ee gudaha caasimadda lagu dhex wato.
Warbaahinta Dunida Maanta ayaa sii wada dabagalka xaaladdan, waxaana la filayaa in saacadaha soo socda ay soo baxaan faahfaahin dheeraad ah oo ku saabsan sababaha rasmiga ah ee keenay hakinta kolonyada iyo natiijada wada hadalladii lagu soo afjaray arrintaasi.
