Garsoore Cumar Cartan oo si heer sare ah loogu soo dhoweeyey Muqdisho kaddib markii laga celiyey Maraykanka
Garsooraha caalamiga ah ee Soomaaliyeed, Cumar Cabdullaahi Cartan, ayaa maanta si weyn loogu soo dhoweeyey magaalada Muqdisho, kaddib markii uu dib ugu soo laabtay dalka isagoo laga celiyey dalka Maraykanka, halkaas oo uu u socday ka qaybgalka tartanka Koobka Adduunka ee Naadiyada oo sanadkan lagu qabanayo Maraykanka.
Cumar Cartan ayaa ka mid ahaa garsoorayaasha caalamiga ah ee ay FIFA u xulatay inay dhex-dhexaadiyaan ciyaaraha tartankan, taas oo ahayd guul weyn oo u soo hoyatay Soomaaliya iyo guud ahaan kubadda cagta Afrika. Hase yeeshee, markii uu gaaray garoonka diyaaradaha ee magaalada Miami, ayay saraakiisha socdaalka Maraykanku u diideen inuu dalka galo, waxaana dib loogu celiyey magaalada Istanbul ee dalka Turkiga
Dhacdadan ayaa si weyn u qabsatay warbaahinta caalamka iyo baraha bulshada 48-dii saac ee la soo dhaafay, iyadoo dad badan ay su’aalo ka keeneen sababta garsoore si rasmi ah loogu martiqaaday tartan caalami ah loogu diiday gelitaanka dalka martigelinaya tartanka.
Wararka la helayo ayaa sheegaya in tallaabada lagu celiyey Garsoore Cartan ay la xiriirtay xayiraadaha socdaal ee Maraykanku kusoo rogay muwaadiniinta dalal dhowr ah oo ay Soomaaliya ku jirto. Inkastoo uu watay dukumentiyada looga baahan yahay ka qaybgalka tartanka, haddana waxaa loo adeegsaday shuruucda socdaalka ee dalkaasi.
Hay’adda FIFA ayaa iyaduna ka hadashay arrintan, iyadoo sheegtay inaysan awood sharci u lahayn inay faragelin ku sameyso go’aannada ay gaaraan hay’adaha socdaalka ee waddamada martigelinaya tartamada. Hadalka FIFA ayaa dhaliyey falcelin kala duwan, waxaana qaar ka mid ah taageerayaasha kubadda cagta iyo falanqeeyayaasha isboortigu ku dhaliileen madaxda hay’addaasi inay ku guuldarreysteen difaacidda xuquuqda garsooraha Soomaaliyeed.
Dowladda Federaalka Soomaaliya ayaa sidoo kale ka hadashay dhacdadan, iyadoo ku tilmaantay tallaabada lagu celiyey Garsoore Cumar Cartan mid aan waafaqsanayn ruuxa iskaashiga ciyaaraha iyo xiriirka caalamiga ah. Dowladda ayaa muujisay walaaceeda ku aaddan in muwaadin Soomaaliyeed oo loo xushay hawl caalami ah loo diido inuu guto waajibaadkiisa shaqo.
Markii uu maanta soo gaaray Garoonka Diyaaradaha Aadan Cadde ee Muqdisho, waxaa halkaas ku qaabilay boqolaal qof oo isugu jiray masuuliyiin, bahda ciyaaraha, dhalinyaro iyo taageerayaal aad u tiro badan. Dadkii soo dhoweeyey ayaa muujiyey taageero iyo garab istaag ay la barbar taagan yihiin garsooraha Soomaaliyeed, iyagoo ku tilmaamay shaqsi sumcad weyn u soo hooyey dalka.
Garsoore Cumar Cartan ayaa sannadihii u dambeeyey noqday mid ka mid ah garsoorayaasha ugu magaca weyn Afrika, isagoo dhex-dhexaadiyey tartamo heer qaaradeed iyo kuwo caalami ah. Inkastoo uu la kulmay caqabaddan, haddana taageerayaal badan ayaa aaminsan in dhacdadani aysan waxba u dhimayn sumcaddiisa iyo guulaha uu gaaray.
Soo dhoweyntii maanta loogu sameeyey Muqdisho ayaa muujinaysa sida ay shacabka Soomaaliyeed ugu faanayaan guulaha uu gaaray Garsoore Cumar Cartan, isla markaana ay u arkaan astaan matalaysa kartida iyo hibada Soomaaliyeed ee gaartay heerarka ugu sarreeya ee garsoorka kubadda cagta caalamka.
