Guddiga Madaxabannaan ee Doorashooyinka Qaranka iyo Soohdimaha ayaa maanta magaalada Dhuusamareeb soo gaarsiiyey agabka rasmiga ah ee loo adeegsan doono doorashooyinka Golaha Deegaanka ee lagu qabanayo deegaannada Dowlad Goboleedka Galmudug. Tallaabadan ayaa qeyb ka ah diyaar-garowga ballaaran ee lagu xaqiijinayo in doorashooyinku u dhacaan si hufan, daahfuran, amni leh, isla markaana waafaqsan shuruucda iyo habraacyada doorashooyinka dalka.
Agabka la geeyey Dhuusamareeb ayaa isugu jira dhammaan qalabka muhiimka u ah qabsoomidda doorashada, sida sanaadiiqda codbixinta, waraaqaha codadka, qalabka lagu aqoonsanayo codbixiyeyaasha, agabka xafiisyada goobaha codbixinta iyo qalab kale oo farsamo oo loogu talagalay in lagu fududeeyo habsami u socodka doorashada. Mas’uuliyiinta guddiga ayaa sheegay in agabkan loo sii qaybin doono degmooyinka iyo goobaha codbixinta ka hor maalinta doorashada.
Guddoomiyaha Guddiga Madaxabannaan ee Doorashooyinka Qaranka iyo Soohdimaha, Mudane Cabdikariin Axmed Xasan, ayaa sheegay in dhammaan diyaar-garowgii muhiimka ahaa uu marayo meel wanaagsan, isla markaana guddigu uu si joogto ah ula shaqeynayo maamulka Galmudug, hay’adaha amniga iyo bahda ku lugta leh hirgelinta doorashada.
Guddoomiyuhu wuxuu shaaciyey in doorashooyinka Golaha Deegaanka ay ka dhici doonaan 11 degmo oo ka tirsan Dowlad Goboleedka Galmudug, iyadoo guud ahaan la diyaariyey 140 goobood oo codbixineed oo ay shacabka ka dhiiban doonaan codkooda. Waxa uu tilmaamay in goobahaas loo qorsheeyey si ay u daboolaan baahida codbixiyeyaasha, isla markaana shacabka loogu fududeeyo inay si xor iyo xalaal ah uga qeyb qaataan doorashada.
Mudane Cabdikariin Axmed Xasan ayaa sidoo kale xusay in guddigu uu tababbarro u soo xiray shaqaalaha ka howlgeli doona goobaha codbixinta, kuwaas oo loo carbiyey maamulka doorashada, ilaalinta qarsoodiga codbixinta, tirinta codadka iyo u hoggaansanaanta habraacyada sharciga ah ee doorashooyinka.
Waxa uu ugu baaqay shacabka Galmudug inay si nabad ah uga qeyb qaataan doorashada, kana fogaadaan wax kasta oo carqaladeyn kara geeddi-socodka dimuqraadiyadeed. Sidoo kale, wuxuu adkeeyey in guddigu uu ka go’an yahay ilaalinta cadaaladda, daahfurnaanta iyo kalsoonida shacabka ee doorashada.
Dhanka kale, maamulka Galmudug iyo hay’adaha amniga ayaa kordhiyey dadaallada lagu xaqiijinayo amniga goobaha codbixinta, gaadiidka sida agabka doorashada iyo shaqaalaha guddiga, si doorashooyinku ugu dhacaan jawi deggan oo ammaan ah.
Doorashooyinkan ayaa muhiim u ah hirgelinta nidaamka dimuqraadiyadda ee qof iyo cod, waxaana loo arkaa tallaabo weyn oo lagu xoojinayo dowladnimada, ka qeybgalka shacabka iyo dhismaha goleyaasha deegaanka ee si toos ah uga yimaada rabitaanka muwaadiniinta. Dowladda Federaalka Soomaaliya iyo Guddiga Madaxabannaan ee Doorashooyinka Qaranka ayaa ku celceliyey inay ka go’an tahay qabsoomidda doorashooyin xor iyo xalaal ah oo shacabka Soomaaliyeed ay door muuqda ku yeeshaan.
