Shariif Sheekh Axmed iyo Farmaajo oo Cambaareeyey Xiisadaha Siyaasadeed ee Muqdisho Kana Hadlay Muranka Doorashooyinka kuna adkaystay inaysan waxba ka jirin Doorashooyinka hada Dalka ka socanaya loona laabto Doorasho Dadban oo la isla ogol yahay.
Muqdisho: Madaxweynihii hore ee Soomaaliya, Shariif Sheekh Axmed, ayaa shir jaraa’id ku qabtay hoygiisa ku yaalla aagga Garoonka Diyaaradaha Aadan Cadde ee magaalada Muqdisho, isagoo si faahfaahsan uga hadlay dhacdooyinkii iyo xaaladihii uu la kulmay maalmihii la soo dhaafay.
Shirka jaraa’id waxaa ku wehlinayey madaxweynihii hore ee Soomaaliya, Maxamed Cabdullaahi Farmaajo, waxaana labada masuul si wadajir ah uga hadleen xaaladda siyaasadeed ee dalka, gaar ahaan xiisadaha iyo isku dhacyadii dhawaan ka dhacay magaalada Muqdisho.
Shariif Sheekh Axmed ayaa dowladda federaalka ku eedeeyey inay mas’uul ka tahay xaaladaha amni iyo siyaasadeed ee cakiran ee dalka ka taagan, isaga oo si gaar ah farta ugu fiiqay Madaxweyne Xasan Sheekh Maxamuud. Wuxuu sheegay in loo baahan yahay in cadaadis siyaasadeed lagu saaro madaxda dowladda si loo helo hannaan doorasho oo ay ku wada qanacsan yihiin dhammaan dhinacyada siyaasadda Soomaaliya.
Sida uu hadalka u dhigay Shariif Sheekh Axmed, xilligan waxaa muhiim ah in la qabto doorasho loo dhan yahay oo ay qayb ka yihiin dhammaan saamileyda siyaasadda dalka. Hadalkiisa ayaa loo fasiran karaa in mucaaradku aysan weli aqoonsanayn ama ku qanacsanayn hannaanka doorashooyinka qof iyo cod ee ay dowladda federaalku waddo.
Dhankiisa, Maxamed Cabdullaahi Farmaajo ayaa isaguna cambaareeyey rabshadaha iyo qalalaasaha ka dhacay Muqdisho maalmihii la soo dhaafay. Wuxuu ku baaqay in la ilaaliyo xasilloonida dalka, isla markaana dhinacyada siyaasadda ay miiska wada-hadalka ku xalliyaan khilaafaadka jira, si looga fogaado xaalado amni darro iyo colaad hor leh.
Labada madaxweyne hore ayaa ku celceliyey in Soomaaliya ay ku jirto marxalad siyaasadeed oo xasaasi ah, taas oo u baahan tanaasul, wada-hadal iyo is-afgarad siyaasadeed. Waxay sidoo kale walaac ka muujiyeen kororka xiisadaha siyaasadeed iyo amni ee ka jira caasimadda, iyagoo ku baaqay in la dhowro dastuurka, sharciga iyo xuquuqda muwaadiniinta.
Xasaradaha ka dhashay muranka la xiriira hannaanka doorashooyinka dalka ayaa weli taagan, mana jiro xal rasmi ah oo laga gaaray khilaafka u dhexeeya dowladda iyo mucaaradka. Xiisadahaas ayaa mararka qaar isu beddelay gacan ka hadal iyo iska horimaadyo hubeysan, kuwaas oo walaac ku abuuray bulshada Soomaaliyeed iyo beesha caalamka.
Falanqeeyayaal siyaasadeed ayaa aaminsan in heerka uu maanta marayo khilaafka siyaasadeed uu yahay mid ka mid ah marxaladihii ugu adkaa ee Soomaaliya soo marto sannadihii u dambeeyey, iyadoo dhinacyada siyaasadda ay weli isku maandhaafsan yihiin jihada doorashooyinka iyo mustaqbalka nidaamka siyaasadeed ee dalka.
Si kastaba ha ahaatee, indhaha shacabka Soomaaliyeed ayaa ku wajahan dadaallada lagu raadinayo xal siyaasadeed oo lagu soo afjaro muranka taagan, si dalka looga badbaadiyo qalalaase siyaasadeed iyo amni oo hor leh.
