Booliiska Gobolka Banaadir oo Soo Bandhigay Hub Faro Badan oo laga Helay Hotel Elite, Milkiilaha Hoteelkuna waa Beeniyey Eedeymaha Dowladu u soo jeedisay waxa uuna sheegay in Ganacsigiisa lagu Sumcad dilayo sida uu Hadalka u dhigay.
Muqdisho: Ciidanka Booliiska Gobolka Banaadir ayaa maanta soo bandhigay hub iyo saanad ciidan oo tiro badan, kuwaas oo sida ay sheegeen laga helay Hotel Elite ee magaalada Muqdisho.
Hubka la soo bandhigay ayaa isugu jira qoryaha garabka laga tuuro ee RPG-ga, qoryaha culus ee BKM-ka, rasaas aad u badan iyo diyaaradaha aan duuliyaha lahayn (Drones), kuwaas oo mararka qaar loo adeegsado basaasidda iyo fulinta weerarro qaraxyo la xiriira.
Maalmihii la soo dhaafay ayaa ciidamada ammaanku ku sugnaayeen Hotel Elite, iyagoo halkaasi ka waday baaritaanno la xiriira amniga. Maanta ayay Booliisku si rasmi ah warbaahinta ugu soo bandhigeen hubkaasi, iyagoo sheegay inuu qayb ka yahay hub sharci-darro ah oo lagu qabtay howlgal ay ciidamada ammaanku sameeyeen.
Taliyaha Booliiska Gobolka Banaadir, Macallin Mahdi, oo warbaahinta la hadlay ayaa sheegay in aan Muqdisho lagu oggolaan doonin in lagu keydiyo ama lagu haysto hub sharci-darro ah. Waxa uu xusay in ciidamada ammaanku sii wadi doonaan howlgalada lagu xaqiijinayo amniga caasimadda iyo la dagaallanka cid kasta oo isku dayda inay hub si sharci-darro ah u urursato.
“Ma jirto cid Muqdisho ku haysan karta hub sharci-darro ah. Ciidamada ammaanku waxay sii wadi doonaan howlgalada lagu sugayo amniga shacabka,” ayuu yiri Taliyaha Booliiska Gobolka Banaadir.
Dhanka kale, milkiilaha Hotel Elite, Cabdullaahi Maxamed Nuur, ayaa si adag u beeniyey eedeymaha la xiriira hubka la soo bandhigay. Waxa uu sheegay in hubkaasi aanu wax xiriir ah la lahayn hoteelkiisa, isaga oo ku eedeeyey ciidamada Booliiska inay iyagu geeyeen goobta si ay sumcad-darro ugu sameeyaan ganacsigiisa.
Milkiilaha hoteelka ayaa qoraal uu ku baahiyey bartiisa Facebook ku sheegay in dhammaan eedeymaha loo jeediyey ay yihiin kuwo aan sal iyo raad lahayn. Waxa uu ku baaqay in la sameeyo baaritaan madax-bannaan oo lagu ogaanayo xaqiiqada dhacdadan.
Warbaahinta madaxa-bannaan ayaa lagu casuumay goobta lagu soo bandhigay hubka, si ay u tabiyaan dhacdadan oo noqotay markii saddexaad ee Booliiska Gobolka Banaadir ay soo bandhigaan hub iyo saanad ciidan oo ay sheegeen inay ku qabteen howlgaladooda amni.
Muddooyinkii dambe, gaar ahaan wixii ka dambeeyey khilaafka iyo isku dhacyadii u dhexeeyey Dowladda Federaalka Soomaaliya iyo qaar ka mid ah mucaaradka, waxaa sii kordhay baaritaannada iyo howlgalada ay ciidamada ammaanku ka sameynayaan magaalada Muqdisho. Howlgaladan ayaa lagu bartilmaameedsanayaa hubka sharci-darrada ah iyo dadka lagu tuhunsan yahay inay ku lug leeyihiin falal amniga lid ku ah.
Si kastaba ha ahaatee, dhacdadan cusub ayaa dhalisay dood iyo aragtiyo kala duwan, iyadoo dhinac walba uu soo bandhigayo sheegashooyin u gaar ah. Ilaa hadda ma jiro war rasmi ah oo madax-bannaan oo xaqiijinaya cidda saxda ah ee hubkan iska leh, waxaana la filayaa in baaritaannada socda ay iftiimin doonaan xaqiiqada dhacdadan.
