Magaalada Dhuusamareeb ee caasimadda Dowlad-goboleedka Galmudug waxaa ka socda qabanqaabadii ugu dambeysay ee lagu soo dhaweynayo Ra’iisul Wasaaraha Xukuumadda Federaalka Soomaaliya, Xamse Cabdi Barre, iyo wafdi uu hoggaaminayo oo la filayo inuu soo gaaro magaalada.
Dhusamareb 24 June 2026: Safarka Ra’iisul Wasaaraha ayaa kusoo beegmaya xilli ay socdaan dadaallo siyaasadeed oo lagu doonayo in lagu xoojiyo wada-hadalka u dhexeeya Dowladda Federaalka Soomaaliya iyo hoggaanka Galmudug, iyadoo kulamo muhiim ah la filayo inay ka dhacaan Dhuusamareeb. Warar hore ayaa sheegayay in socdaalka Xamse Cabdi Barre uu la xiriiro xaaladda siyaasadeed ee Galmudug iyo sidii xal looga gaari lahaa arrimaha taagan.
Ujeedada ugu weyn ee booqashada Ra’iisul Wasaaraha ayaa lagu sheegay inay tahay ka qaybgalka dhammeystirka is-afgarad siyaasadeed oo dhexmaraya Dowladda Federaalka iyo Madaxweynaha Galmudug, Axmed Cabdi Kaariye (Qoor Qoor), kaas oo la xiriira xaaladda siyaasadeed ee maamulka iyo mustaqbalka doorashooyinka Galmudug.
Maalmihii lasoo dhaafay magaalada Dhuusamareeb waxaa ku sugnaa Agaasimaha Hay’adda Nabad Sugidda iyo Sirdoonka Qaranka (NISA), Mahad Maxamed Salaad, kaas oo kulamo kala duwan la yeeshay Madaxweyne Qoor Qoor. Kulamadaasi ayaa lagu sheegay inay diiradda saarayeen arrimo siyaasadeed iyo kuwo amni, iyadoo ay socdeen dadaallo lagu doonayo in lagu gaaro faham wadajir ah oo u dhexeeya dhinacyada.
Sida ay sheegayaan wararka la helayo, wada-hadallada ayaa qayb ka ah dadaallo lagu dejinayo khilaafaadka siyaasadeed ee ka jira Galmudug, iyadoo Dowladda Federaalka ay dooneyso in la helo jawi siyaasadeed oo deggan, isla markaana maamulka Galmudug uu sii wado howlaha dowladnimada iyo diyaar garowga doorashooyinka soo socda.
Soo dhaweynta Ra’iisul Wasaaraha ayaa waxaa ka qayb qaadanaya mas’uuliyiin ka tirsan Dowladda Galmudug, oo ay ku jiraan xildhibaano, wasiirro, agaasimayaal iyo qeybaha kala duwan ee bulshada. Garoonka diyaaradaha Dhuusamareeb waxaa kusii qulqulaya masuuliyiin iyo shacabka deegaanka kuwaas oo diyaar u ah inay soo dhaweeyaan wafdiga Ra’iisul Wasaaraha.
Waxaa sidoo kale la filayaa in Madaxweynaha Galmudug, Axmed Cabdi Kaariye (Qoor Qoor), uu garoonka yimaado si uu u soo dhaweeyo Ra’iisul Wasaaraha iyo wafdiga uu hoggaaminayo, taas oo loo arko tallaabo muujinaysa muhiimadda ay leedahay booqashadan.
Kulamada ka dhici doona Dhuusamareeb ayaa indhaha lagu hayaa, maadaama ay saameyn ku yeelan karaan jihada siyaasadeed ee Galmudug iyo xiriirka u dhexeeya Dowladda Federaalka iyo dowlad-goboleedkaas. Dad badan ayaa rajeynaya in wada-hadallada socda ay horseedaan xal siyaasadeed oo waara iyo xasillooni dheeraad ah.
Booqashada Ra’iisul Wasaare Xamse Cabdi Barre ayaa noqonaysa mid ka mid ah kulamadii ugu muhiimsanaa ee siyaasadeed ee dhawaan ka dhacay Dhuusamareeb, iyadoo dhinacyada kala duwan ay sugayaan natiijada kasoo baxda wada-hadallada la filayo.
