Nairobi, Kenya 9 Agoosto 2026: Booliska Kenya ayaa magaalada Nairobi ku xiray nin lagu magacaabo Mohamud Hared, kadib markii lagu qabtay diyaarad aan duuliye lahayn (drone) oo la sheegay in loo waday magaalada Beled-Xaawo ee gobolka Gedo, Soomaaliya.
Hared ayaa Jimcihii lagu qabtay xarun shirkad xamuul oo ku taalla xaafadda Eastleigh ee Nairobi, halkaas oo uu u tagay inuu kala wareego baakad laga soo diray dalka Shiinaha.
Sida lagu sheegay xogta booliska, shaqaalaha shirkadda xamuulka ayaa ka shakiyay baakadda kadib markii ay ogaadeen in si adag loo xirxiray, isla markaana aan si cad loo sheegin waxa ku jira. Hared ayaa la sheegay inuu lacagta xamuulka ku bixiyay adeegga M-Pesa, kadibna uu codsaday in baakadda loo furo.
Markii baakadda la furay, shaqaalaha ayaa gudaha ka helay qaybo drone ah oo la kala furfuray iyo qalab kale oo la xiriira, arrintaas oo sababtay in maamulka shirkaddu si degdeg ah ula xiriiraan booliska.
Ciidamada ammaanka ayaa goobta yimid, waxaana gacanta lagu dhigay Hared, iyadoo markii dambe loo qaaday saldhigga booliska Pangani ee Nairobi si su’aalo looga weydiiyo halka uu ka yimid qalabka iyo cidda loogu talagalay.
Drone-ka oo loo waday Beled-Xaawo
Sida ay sheegeen booliska Kenya, Hared ayaa baarayaasha u sheegay in drone-ka loo waday magaalada Beled-Xaawo, iyadoo qorshuhu ahaa in marka hore qalabka la geeyo magaalada Mandera, oo ku taalla xadka Kenya iyo Soomaaliya.
Xogta baaritaanka ayaa sidoo kale tilmaamaysa in qalabka Mandera laga wareegi lahaa nin lagu magacaabo Yussuf Abdi Abdille, oo la sheegay inuu deggan yahay magaaladaas.
Ilaa hadda lama oga sababta dhabta ah ee drone-ka loogu waday Beled-Xaawo iyo qofka ama cidda ugu dambeyntii isticmaali lahayd. Booliska Kenya ayaa sheegay inay baaritaan ku hayaan ujeeddada qalabka iyo dadka kale ee laga yaabo inay ku lug leeyihiin soo dejintiisa iyo gudbintiisa.
Hared ayaa weli ku jira gacanta booliska, iyadoo baarayaashu ay isku dayayaan inay ogaadaan qofka Shiinaha kasoo diray baakadda, xiriirka uu la leeyahay Hared iyo qofka la sheegay inuu Mandera kula wareegi lahaa.
Walaac dhinaca amniga ah
Qabashada drone-kan ayaa kusoo aadeysa xilli hay’adaha ammaanka Kenya ay si dhow ula socdaan dhaqdhaqaaqyada ka jira deegaannada ku dhow xuduudda Soomaaliya, gaar ahaan Mandera oo muddooyinkii dambe wajahday khataro dhinaca amniga ah.
Beled-Xaawo, oo ku taalla dhinaca Soomaaliya kana soo horjeedda Mandera, ayaa ah marin muhiim ah oo ay labada dal isaga gudbaan dad iyo badeecooyin.
Booliska Kenya ayaa muujiyay walaac ku saabsan in qalabka noocan ah loo adeegsan karo falal amni-darro, hase yeeshee illaa hadda ma jirto caddeyn rasmi ah oo muujinaysa in drone-kan loo qorsheeyay weerar ama fal argagixiso.
Baaritaanka ayaa hadda diiradda lagu saarayaa cidda dhab ahaan iska leh drone-ka, sababta loo soo diray, halka uu ku dambayn lahaa iyo haddii ay jiraan dad kale oo ku lug leh qorshaha.
