Dhusamareb Galmudug 20 Agoosto 2026: Maamulka magaalada Dhuusamareeb, caasimadda Galmudug, ayaa soo saaray amarro iyo digniino lagu doonayo in lagu hagaajiyo bilicda magaalada, nadaafadda iyo nidaamka guud ee goobaha dadweynaha iyo ganacsiga.
Amarradan oo uu ku dhawaaqay Guddoomiyaha Dhuusamareeb, Cabdiraxmaan Geeda-qorow, ayaa bulshada lagu faray inay ka qayb qaataan hagaajinta muuqaalka magaalada, iyadoo maamulka uu sheegay in tallaabo laga qaadi doono cid kasta oo ku xadgudubta awaamiirta cusub.
Qodobada lagu dhawaaqay waxaa ka mid ah in la joojiyo iibinta qaadka bartamaha magaalada, iyadoo maamulka uu sheegay in qaadka laga saari doono goobaha bartamaha Dhuusamareeb. Sidoo kale, waxaa la amray in xoolaha laga fogeeyo gudaha magaalada, iyadoo dadka xoolahooda lagu arko magaalada laga qaadi karo ganaax.
Maamulka ayaa sidoo kale faray in wax laga qabto dhismayaasha duugoobay ee ku yaalla waddooyinka iyo goobaha muhiimka ah ee magaalada. Waxaa intaas dheer, in la mamnuucay sameysashada meherado ka samaysan cooshado, iyadoo ganacsatada aan u hoggaansamin amarkaasi laga qaadi doono tallaabo.
Qorshaha maamulka ayaa sidoo kale taabanaya dhinaca amniga. Guryaha iyo goobaha ganacsiga ayaa lagu dhiirrigeliyay in lagu xiro kaamirooyinka CCTV, halka nalal lagu xiro xaafadaha si kor loogu qaado amniga iyo muuqaalka magaalada xilliyada habeenkii.
Waxaa kale oo maamulka uu soo saaray amar ku saabsan jarista geedaha loo yaqaan Caligaroobka, iyadoo ujeeddadu tahay in la hagaajiyo bilicda iyo hab-dhismeedka magaalada.
Dhanka adeegyada biyaha, ceelasha magaalada ayaa lagu amray inaysan waddooyinka u jarin si aan nidaamsanayn marka ay cilad ka timaaddo dhuumaha biyaha. Arrintan ayaa muhiim u noqon karta ilaalinta waddooyinka iyo yareynta burburka ka dhasha dayactirka dhuumaha.
Nadaafadda ayaa iyaduna qayb weyn ka ah awaamiirta cusub. Maamulka ayaa mamnuucay in qashinka lagu daadiyo ama lagu gubo goobo aan loogu talagelin, taas oo haddii si joogto ah loo fuliyo wax ka tari karta nadaafadda iyo caafimaadka bulshada.
Sidee loo dhaqan gelin karaa?
Amarradan ayaa maamulka u baahan doona inuu la yimaado qorshe cad oo fulineed, maadaama qaar ka mid ah qodobadu ay taabanayaan nolol maalmeedka bulshada iyo ganacsatada. Waxaa muhiim ah in bulshada marka hore si wanaagsan loogu wacyigeliyo awaamiirta, iyadoo loo caddeynayo sababta loo soo saaray iyo tallaabada laga qaadi doono cidda jebisa.
Sidoo kale, maamulka wuxuu u baahan yahay inuu sameeyo kormeer joogto ah, gaar ahaan goobaha ganacsiga, waddooyinka waaweyn iyo xaafadaha, si loo hubiyo in awaamiirtu aysan ku ekaan hadal oo keliya.
Dhinaca qashinka, haddii dadka laga mamnuuco meelaha aan loogu talagelin, waa in maamulka uu sidoo kale diyaariyaa goobo rasmi ah oo qashinka lagu ururiyo, si bulshada loogu abuuro beddel ay isticmaalaan.
Haddii xoolaha laga saarayo magaalada, waxaa sidoo kale muhiim ah in la qorsheeyo meelaha loogu talagalay xoolaha iyo waddooyinka ay mari karaan, halka ganacsatada laga doonayo inay joojiyaan cooshadaha ay u baahan yihiin fursado sharci ah oo ay ganacsigooda ugu sii wadan karaan.
Amarrada ayaa loo qabtay muddo 20 maalmood ah in lagu dhaqangeliyo. Su’aasha ugu weyn ayaa noqon doonta sida maamulka Dhuusamareeb u heli doono awoodda, agabka iyo wada-shaqeynta bulshada ee looga baahan yahay fulinta qorshahan.
Haddii si nidaamsan loo dhaqan geliyo, awaamiirtan waxay wax ka tari karaan nadaafadda, bilicda iyo amniga Dhuusamareeb. Hase yeeshee, guusha qorshuhu waxay ku xirnaan doontaa joogteynta kormeerka, wacyigelinta bulshada, adeegyada maamulka iyo in tallaabooyinka lagu qaadayo dadka lagu saleeyo nidaam iyo sinaan.
