Arusha Tanzania 20 Agoosto 2026: Xafiiska Hantidhowrka Guud ee Jamhuuriyadda Federaalka Soomaaliya ayaa si rasmi ah uga mid noqday Koox-hawleedka La-dagaallanka Musuqmaasuqa iyo Dhaqista Lacagaha ee Ururka Caalamiga ah ee Hay’adaha Hantidhowrka Sare (INTOSAI).
Xubinnimada Soomaaliya ayaa lagu dhawaaqay kaddib shirkii 19-aad ee Koox-hawleedka WGFACML, kaas oo saddexdii maalmood ee u dambeeyay, 18 ilaa 20-ka Agoosto 2026, ka socday magaalada Arusha ee dalka Tanzania.
Kulanka waxaa Soomaaliya uga qayb galay Agaasimaha Baarista U Hoggaansanaanta ee Xafiiska Hantidhowrka Guud, kaas oo khudbad uu ka jeediyay shirka kaga mahadceliyay xubinnimada cusub ee Soomaaliya iyo fursadda loo siiyay Xafiiska inuu qayb ka noqdo dadaallada caalamiga ah ee la xiriira hufnaanta maaliyadeed iyo la-dagaallanka musuqmaasuqa.
Ku biirista kooxda caalamiga ah ayaa Xafiiska Hantidhowrka Guud u abuureysa fursad uu si dhow ula shaqeeyo hay’adaha hantidhowrka sare ee dalalka kale, iyadoo xoogga la saarayo horumarinta aqoonta, xirfadaha iyo habraacyada hantidhowrka.
Sidoo kale, xubinnimadu waxay Soomaaliya u oggolaaneysaa inay ka qayb qaadato is-weydaarsiga khibradaha iyo aqoonta la xiriirta baaritaannada maaliyadeed, musuqmaasuqa iyo dambiyada kale ee saameeya maareynta hantida iyo dhaqaalaha dowladda.
Shirkii Arusha ayaa sidoo kale looga hadlay arrimo muhiim u ah xoojinta isla-xisaabtanka iyo daahfurnaanta hay’adaha dowladda. Waxaa si gaar ah loo eegay muhiimadda ay leedahay helitaanka xog hufan oo ku saabsan milkiilayaasha dhabta ah ee shirkadaha iyo hay’adaha ganacsi, korjoogteynta nidaamyada wax iibsiga iyo qandaraasyada dowladda, iyo sidii loo qiimeyn lahaa khataraha ka dhasha musuqmaasuqa, qiyaanada iyo dhaqista lacagaha.
Ka qaybgalka Soomaaliya ee kooxda ayaa sidoo kale xoojinaya doorka Xafiiska Hantidhowrka Guud ee ku aaddan horumarinta nidaamyada isla-xisaabtanka iyo la socodka sida loo maareeyo hantida dadweynaha.
Xubinnimada cusub ayaa loo arkaa tallaabo muhiim ah oo Soomaaliya u sahleysa inay si firfircoon uga qayb qaadato dadaallada caalamiga ah ee lagu xoojinayo daahfurnaanta iyo la-dagaallanka musuqmaasuqa. Waxa kale oo ay Xafiiska siin kartaa fursad uu ku helo khibrado iyo habraacyo caalami ah oo kor u qaadi kara tayada baaritaannada iyo warbixinnada hantidhowrka ee dalka.
Tallaabadan ayaa ku soo beegmaysa xilli Soomaaliya ay waddo dadaallo lagu xoojinayo hay’adaha isla-xisaabtanka iyo hufnaanta maamulka maaliyadda, iyadoo la doonayo in baaritaannada iyo kormeerka hay’adaha dowladda ay yeeshaan saameyn muuqata oo ka qayb qaadata ka hortagga iyo la-dagaallanka dambiyada la xiriira hantida iyo dhaqaalaha qaranka.
