Washington 23 Agoosto 2026: Maxkamad federaal ah oo ku taalla Mareykanka ayaa laashay siyaasaddii maamulka Madaxweyne Donald Trump ee lagu hakiyey habraaca fiisaha muhaajiriinta ee muwaadiniinta 75 dal, oo Soomaaliya ay ka mid tahay.
Go’aanka waxaa 21-kii Agoosto soo saartay Garsoore Federaal Jeannette Vargas, iyadoo sheegtay in siyaasaddii uu dejiyey Xoghayaha Arrimaha Dibadda Mareykanka Marco Rubio ay ka baxsanayd awoodda sharciga ah ee uu leeyahay, isla markaana aysan waafaqsanayn xeerarka federaalka ee socdaalka Mareykanka.
Garsoore Vargas ayaa go’aankeeda ku caddeysay in siyaasadda si guud loogu hakiyey bixinta fiisaha muhaajiriinta iyadoo lagu salaynayo jinsiyadda ama dalka uu qofku ka soo jeedo, taasoo ay sheegtay inay ka hor imanayso nidaamka sharciga Mareykanka ee dhigaya in go’aanka fiisaha lagu saleeyo xaaladda iyo u-qalmitaanka qofka codsanaya.
Hakinta la laalay ayaa dhaqan gashay 21-kii Janaayo 2026, waxaana lagu dabaqay muwaadiniinta 75 dal oo ay Soomaaliya ka mid tahay. Dowladda Mareykanka xilligaas waxay sheegtay in tallaabadu qayb ka ahayd dib-u-eegis lagu sameynayay habraacyada socdaalka iyo baaritaanka dadka doonaya fiisaha muhaajiriinta, iyadoo walaac laga muujiyay dadka loo arko inay ku tiirsanaan karaan adeegyada dowladda.
Soomaaliya waxay ka mid ahayd dalalka ay saameysay siyaasaddaas, waxaana sidoo kale liiska ku jiray dalal ay ka mid yihiin Brazil, Colombia, Uruguay, Bosnia iyo Herzegovina, Albania, Pakistan iyo Bangladesh, iyo dalal kale oo ku kala yaalla Afrika, Aasiya, Bariga Dhexe, Yurub iyo Latin America.
Go’aanka cusub ayaa meesha ka saaraya siyaasaddii si guud u hakisay habraaca fiisaha muhaajiriinta ee dadka ka soo jeeda 75-ka dal, iyadoo Garsoore Vargas ay tilmaantay in saraakiisha qunsuliyadaha ay leeyihiin awoodda iyo masuuliyadda ay ku go’aaminayaan u-qalmitaanka qof kasta ee fiisaha, iyadoo la eegayo shuruudaha uu dhigayo sharciga Mareykanka.
Tallaabadan ayaa muhiimad gaar ah u leh muwaadiniinta Soomaaliyeed ee doonaya inay Mareykanka ugu safraan arrimo la xiriira isu keenista qoysaska, shaqada ama socdaalka joogtada ah, maadaama Soomaaliya ay ka mid ahayd dalalkii lagu daray liiska 75-ka waddan ee hakinta lagu sameeyay.
Si kastaba ha ahaatee, go’aanka maxkamaddu wuxuu khuseeyaa siyaasaddii hakisay habraaca fiisaha muhaajiriinta, mana la micno aha in dhammaan xayiraadaha kale ee socdaalka ama fiisaha ee Mareykanka laga qaaday muwaadiniinta Soomaaliya. Wasaaradda Arrimaha Dibadda Mareykanka waxay weli leedahay siyaasado iyo xayiraado kale oo socda oo khuseeya noocyada fiisaha iyo dalalka kala duwan.
