Kulankan ayaa waxaa ka soo qaybgala Masuuliin ka tisan Galmudug sida Xildhibaano iyo Wasiiro Maamulka Caasimada iyo Bulshada Qaybeheeda kala duwaxaan waxaana diirada lagu saarayey iskaashiga labada dhinac.
Magaalada Dhuusamareeb ee caasimadda Dowlad Goboleedka Galmudug ayaa lagu qabtay kulan muhiim ah oo u dhexeeyay laamaha ammaanka, masuuliyiinta dowladda iyo qeybaha kala duwan ee bulshada, kaas oo diiradda lagu saaray xoojinta amniga iyo iskaashiga ka dhexeeya shacabka iyo ciidamada Booliiska.
Kulankan oo ay ka qeybgaleen xubno ka socday Golayaasha Dowladda Galmudug, maamulka caasimadda Dhuusamareeb, saraakiisha ciidamada Booliiska iyo wakiillo ka socday bulshada rayidka ah, ayaa looga hadlay xaaladda amni ee magaalada iyo deegaannada hoos yimaada, iyadoo si gaar ah loo falanqeeyay doorka ay bulshada ku leedahay sugidda amniga.
Masuuliyiintii iyo saraakiishii kulanka ka hadlay ayaa tilmaamay in amniga Dhuusamareeb uu yahay mid si weyn u soo hagaagay sannadihii la soo dhaafay, taasoo ay ku ammaaneen ciidamada Booliiska ee ka howl-gala magaalada. Waxaa la xusay in dadaalka joogtada ah ee Booliiska uu ka qeyb qaatay xasiloonida ay maanta ku naaloonayaan shacabka magaalada iyo deegaannada ku xeeran.
Kulanka ayaa sidoo kale lagu bogaadiyay Taliska Booliiska Dhuusamareeb, iyadoo lagu ammaanay sida ay u gutaan waajibaadkooda shaqo, gaar ahaan dhinacyada ilaalinta nabadgelyada, ka hortagga falalka amniga lidka ku ah iyo la shaqeynta bulshada. Ka qeybgalayaashu waxay sheegeen in ciidamada Booliiska ay laf-dhabar u yihiin amniga magaalada, isla markaana ay muhiim tahay in la sii xoojiyo taageerada loo hayo.
Intii uu socday kulanka waxaa si qoto dheer looga hadlay muhiimadda iskaashiga ka dhexeeya shacabka iyo hay’adaha ammaanka. Waxaa la tilmaamay in amniga aanu ku koobnayn oo keliya ciidamada ammaanka, balse uu yahay masuuliyad wadajir ah oo ay bulshada door weyn ku leedahay. Sidaas darteed, shacabka ayaa lagu dhiirrigeliyay inay si dhow ula shaqeeyaan Booliiska, isla markaana la wadaagaan xog kasta oo gacan ka geysan karta sugidda amniga iyo ka hortagga falalka wax u dhimaya nabadda.
Dhamaan dhinacyadii ka qeybgalay kulanka ayaa isku raacay in amniga caasimadda Galmudug uu yahay arrin lama taabtaan ah oo mudan in laga wada shaqeeyo. Waxay carrabka ku adkeeyeen in ilaalinta xasilloonida Dhuusamareeb ay muhiim u tahay horumarka, adeegyada bulshada iyo kobaca dhaqaale ee magaalada.
Gabagabadii kulanka, waxaa la isku raacay in la sii ambaqaado kulamada noocan oo kale ah si loo xoojiyo wada-shaqeynta ka dhexeysa bulshada iyo hay’adaha ammaanka. Waxaa sidoo kale la adkeeyay in la sameeyo wacyigelin joogto ah oo bulshada lagu baraarujinayo kaalinta ay ku leeyihiin ilaalinta nabadda iyo xasiloonida.
Kulankan ayaa kusoo dhammaaday jawi isfaham iyo wadajir leh, iyadoo dhammaan ka qeybgalayaashu ay muujiyeen sida ay uga go’an tahay ilaalinta amniga iyo xasilloonida magaalada Dhuusamareeb iyo guud ahaan deegaannada Dowlad Goboleedka Galmudug.
