Madaxweynaha Somaliland, Mudane Cabdiraxmaan Maxamed Cabdillaahi (Cirro), iyo wefti ballaadhan oo uu hoggaaminayo ayaa maalintii afraad ku guda jira booqasho rasmi ah oo ay ku joogaan Israa’iil. Intii ay booqashadu socotay, Madaxweynaha iyo weftigiisu waxay kulan muhiim ah la yeesheen Wasiirka Wasaaradda Gaashaandhigga Israa’iil, Israel Katz, iyo masuuliyiin sare oo ka tirsan dowladda Israa’iil.
Kulankan ayaa diiradda lagu saaray arrimo istaraatiiji ah oo khuseeya amniga, xasilloonida gobolka, iskaashiga hay’adaha amniga iyo sidii loo xoojin lahaa xiriirka u dhexeeya Somaliland iyo Israa’iil. Madaxweynaha Somaliland waxaa kulanka ku weheliyey Wasiirka Amniga Somaliland, Taliyaha Ciidanka Qaranka, Agaasime Ku-xigeenka Hay’adda Sirdoonka Qaranka, wasiirro iyo xubno kale oo sare oo ka tirsan weftiga rasmiga ah.
Sida lagu sheegay war-murtiyeedyo ka soo baxay dhinacyada kulanka yeeshay, wada-hadalladu waxay si gaar ah u taabteen xaaladaha amni ee gobolka Geeska Afrika iyo Bariga Dhexe, iyadoo labada dhinac ay isla qaateen muhiimadda ay leedahay iskaashi ku salaysan is-ixtiraam, dano wadaag iyo ka shaqaynta nabadda iyo xasilloonida gobolka.
Madaxweyne Cirro iyo Wasiir Israel Katz ayaa sidoo kale ka wada hadlay fursadaha lagu kobcin karo iskaashiga dhinacyada amniga iyo isdhaafsiga khibradaha, gaar ahaan arrimaha la xidhiidha la dagaallanka khataraha amni ee isa soo taraya. Labada dhinac waxay muujiyeen sida ay uga go’an tahay xoojinta xiriirka saaxiibtinimo iyo iskaashiga istaraatiijiga ah ee mustaqbalka.
Kulankan ayaa loo arkaa mid taariikhi ah maadaama uu ka mid yahay dadaallada ay Somaliland ku doonayso inay ku ballaadhiso xidhiidhadeeda diblomaasiyadeed iyo iskaashigeeda caalamiga ah. Dowladda Somaliland ayaa muddooyinkii dambe xooga saartay sidii ay u heli lahayd saaxiibo cusub oo caalami ah, isla markaana u kobcin lahayd iskaashiyada dhinacyada amniga, dhaqaalaha iyo horumarka.
Dhanka kale, safarka Madaxweyne Cirro ee Israa’iil ayaa maalmihii la soo dhaafay si weyn loogu hadal hayey gudaha iyo dibadda gobolka Geeska Afrika. Safarkan ayaa dhaliyey dood iyo falanqayn ballaadhan oo ku saabsan saamaynta uu ku yeelan karo xiriirrada gobolka iyo siyaasadda dibadda ee Somaliland. Qaar ka mid ah falanqeeyayaasha siyaasadda ayaa u arka tallaabo muujinaysa dadaallada Somaliland ee ku aaddan ballaadhinta xidhiidhada caalamiga ah, halka kuwo kalena ay tilmaamayaan in uu muran ka dhex abuuray dalal iyo daneeyayaal kala duwan oo gobolka ku sugan.
Si kastaba ha ahaatee, Dowladda Somaliland ayaa ku adkaysanaysa in booqashadan iyo kulamada la socda ay qayb ka yihiin qorsheyaal lagu horumarinayo danaha qaranka, laguna dhisayo xiriir waara oo ku salaysan kalsooni, iskaashi iyo aragti wadajir ah oo ku wajahan nabad, amni iyo horumar ay ka faa’iidaystaan labada dhinac.
Booqashada Madaxweyne Cirro ee Israa’iil ayaa weli socota, iyadoo la filayo in maalmaha soo socda ay ka soo baxaan faahfaahin dheeraad ah oo ku saabsan kulamada iyo heshiisyada suurtagalka ah ee ay labada dhinac ka gaadhi karaan wada-hadallada socda.
