Muqdisho 21 June 2026: Xafiiska Xeer Ilaaliyaha Guud ee Qaranka ayaa sheegay inuu baaritaan ku wado dhacdo la xiriirta xadgudub loo geystay gabar Soomaaliyeed, isagoo caddeeyay in tallaabo adag oo waafaqsan sharciga laga qaadi doono cid kasta oo lagu helo inay ku lug lahayd falkaasi.
War-saxaafadeed ka soo baxay Xafiiska Xeer Ilaaliyaha Guud ee Qaranka ayaa lagu sheegay in xafiisku, isaga oo gudanaya waajibaadkiisa shaqo iyo ilaalinta xuquuqda muwaadiniinta Soomaaliyeed, uu baaris ku wada denbiyada ka dhanka ah anshaxa, sharafta iyo xuquuqda aadanaha ee bulshada Soomaaliyeed.
Xafiisku wuxuu sheegay in dhacdada la baarayo ay tahay mid ka mid ah falalka foosha xun ee ku xadgudbaya karaamada iyo xuquuqda qofka, gaar ahaan haweenka iyo gabdhaha Soomaaliyeed, kuwaas oo u baahan in la ilaaliyo amnigooda iyo sharciga lagu dhowro xuquuqdooda.
War-saxaafadeedka ayaa lagu xusay in Xafiiska Xeer Ilaaliyaha Guud uu si gaar ah ula socdo baaritaanka dhacdadan, isla markaana uu qaadi doono tallaabo kasta oo sharci ah oo loo baahan yahay si cadaalad loo horgeeyo cid kasta oo lagu helo inay ku lug leedahay falkaasi.
Xafiiska ayaa sidoo kale ugu baaqay dhammaan hay’adaha amniga dalka inay gacan ka geystaan sidii loo xaqiijin lahaa in baaritaanka lagu sameeyo si hufan oo waafaqsan shuruucda dalka, isla markaana aan la oggolaan in falal noocaan ah ay ka baxsadaan gacanta caddaaladda.
Sidoo kale, Xeer Ilaaliyaha Guud ee Qaranka ayaa sheegay in dhammaan hay’adaha amniga ay waajib ku tahay inay ilaaliyaan sharciga, ayna xaqiijiyaan in qof kasta oo ku xadgudba xuquuqda iyo karaamada muwaadiniinta Soomaaliyeed uu wajaho ciqaabta uu mudan yahay.
“Xafiiska Xeer Ilaaliyaha Guud ee Qaranka wuxuu farayaa dhammaan hay’adaha amniga dalka in ay gacanta kusoo dhigaan isla markaana sharciga horkeenaan cid kasta oo ku lug leh falalka noocaas ah,” ayaa lagu yiri war-saxaafadeedka.
Xafiisku wuxuu sidoo kale digniin u diray dhammaan dadka ku dhiirrada falalka waxyeellada u geysanaya bulshada, isagoo sheegay in aan loo dulqaadan doonin xadgudub kasta oo lagu sameeyo muwaadiniinta Soomaaliyeed, gaar ahaan falalka saameeya badqabka iyo sharafka bulshada.
Dhacdadan ayaa mar kale muujinaysa muhiimadda ay leedahay in la xoojiyo dadaallada lagu ilaalinayo amniga bulshada, sare loogu qaadayo wacyiga shacabka iyo in la hubiyo in dadka dhibbanayaasha ah ay helaan cadaalad iyo garab istaag.
Xafiiska Xeer Ilaaliyaha Guud ee Qaranka ayaa ugu dambeyn shacabka Soomaaliyeed ku booriyay inay la shaqeeyaan hay’adaha amniga iyo cadaaladda, ayna soo gudbiyaan xog kasta oo gacan ka geysan karta xaqiijinta caddaaladda iyo sugidda amniga bulshada.
Dowladda Federaalka Soomaaliya ayaa marar badan sheegtay inay ka go’an tahay ilaalinta xuquuqda muwaadiniinta, la dagaallanka falalka xadgudubka ah iyo dhismaha nidaam cadaaladeed oo qof walba uu ku kalsoonaan karo.
