Muqdisho 26 June 2026: Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa ka qayb galay munaasabadda lagu xusayay sannad-guurada 26-ka Juun, oo ah maalin taariikhi ah oo ku weyn shacabka Soomaaliyeed, gaar ahaan markii markii ugu horreysay calan Soomaaliyeed oo xor ah laga taagay gobollada Waqooyi ee dalka.
Madaxweynaha ayaa ubax dhigay Taallada Dhagaxtuur oo ka mid ah astaamaha lagu xusuusto halgankii gobannimo doonka Soomaaliyeed iyo geesiyaashii naftooda u huray sidii shacabka Soomaaliyeed ay uga dulqaadi lahaayeen heeryadii gumeysiga.
Munaasabadda ubax dhigga ayaa ahayd mid lagu maamuusayay halyeeyadii Soomaaliyeed ee door weyn ka qaatay halgankii xorriyadda, kuwaas oo u soo halgamay in shacabka Soomaaliyeed ay helaan xorriyad, qaranimo iyo calan ay leeyihiin.
Taallada Dhagaxtuur waxay ka mid tahay goobaha taariikhiga ah ee xusuusta u ah halgankii dheeraa ee loo soo galay xorriyadda Soomaaliya, waxaana munaasabaddan ay dib u soo celisay xusuusta geesiyaashii Soomaaliyeed ee ku suntanaa halgankii gobannimo doonka.
Madaxweyne Xasan Sheekh Maxamuud ayaa munaasabadda ku muujiyay muhiimadda ay leedahay in la xuso taariikhda dalka iyo kaalintii ay qaateen halgamayaashii Soomaaliyeed ee horseeday xorriyadda iyo dowladnimada maanta jirta.
Munaasabadda waxaa ka qayb galay masuuliyiin ka tirsan Dowladda Federaalka Soomaaliya, saraakiil ka tirsan ciidamada qaranka, iyo qeybaha kala duwan ee bulshada Soomaaliyeed, kuwaas oo si wadajir ah u xusay qiimaha ay leedahay maalinta 26-ka Juun.
26-ka Juun waxay ka mid tahay maalmaha ugu muhiimsan taariikhda Soomaaliya, maadaama ay ahayd maalintii gobollada Waqooyi ay heleen xorriyadda, taas oo noqotay tallaabo muhiim ah oo horseeday midowgii Soomaaliyeed iyo dhismaha Jamhuuriyadda Soomaaliya.
Xuska maalintan ayaa sanad walba shacabka Soomaaliyeed xusuusinaya halgankii dheer ee loo soo galay xorriyadda iyo waajibaadka saaran jiilka maanta ee ah ilaalinta qaranimada, midnimada iyo horumarka dalka.
Madaxweyne Xasan Sheekh Maxamuud iyo dowladda Soomaaliya ayaa mar walba adkeeya muhiimadda ay leedahay in la dhowro taariikhda iyo dhaxalka ay ka tageen halyeeyadii Soomaaliyeed, si jiilasha dambe ay u ogaadaan qiimaha xorriyadda iyo dhibtii loo soo maray.
Munaasabadda 26-ka Juun ayaa noqotay fursad lagu xasuusto halyeeyadii hore, laguna muujiyo ixtiraamka loo hayo dadkii u soo halgamay Soomaaliya xor ah iyo mustaqbal wanaagsan.
