Jabuuti Juun 27 2026: Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta booqasho shaqo ku gaaray magaalada Jabuuti ee caasimadda Jamhuuriyadda Jabuuti, halkaasi oo si diirran loogu soo dhaweeyay.
Madaxweynaha ayaa ka mid ah madaxda iyo mas’uuliyiinta sare ee dowladaha gobolka iyo hay’adaha caalamiga ah ee lagu casuumay munaasabadda qaran ee lagu xusayo sanad-guurada 49-aad ee kasoo wareegtay markii Jamhuuriyadda Jabuuti ay xornimada ka qaadatay gumeystihii Faransiiska, taariikhdaas oo ku beegan 27-ka Juun sanadkii 1977-dii.
Soo dhaweynta Madaxweynaha Soomaaliya waxaa ka qayb galay mas’uuliyiin ka tirsan dowladda Jabuuti, kuwaas oo muujiyay muhiimadda xiriirka dhow ee ka dhexeeya labada dal ee deriska iyo walaalaha ah. Booqashadan ayaa kusoo beegmeysa xilli labada dowladood ay si joogto ah uga shaqeynayaan xoojinta iskaashiga dhinacyada siyaasadda, amniga, dhaqaalaha iyo arrimaha bulshada.
Munaasabadda xuska maalinta xorriyadda Jabuuti ayaa ah mid muhiim ah oo lagu xasuusto halgankii shacabka Jabuuti ay u soo mareen hanashada madaxbannaanidooda, iyadoo sanad walba ay kasoo qaybgalaan madaxda dalalka saaxiibada iyo kuwa gobolka si ay ula wadaagaan shacabka Jabuuti farxadda munaasabadda qaran.
Inta uu ku sugan yahay dalka Jabuuti, Madaxweyne Xasan Sheekh Maxamuud ayaa la filayaa inuu kulan la yeesho Madaxweynaha Jamhuuriyadda Jabuuti, Mudane Ismaaciil Cumar Geelle, halkaas oo labada dhinac ay ka wada hadli doonaan xoojinta xiriirka walaaltinimo iyo iskaashiga taariikhiga ah ee ka dhexeeya labada dowladood iyo labada shacab.
Kulamada labada Madaxweyne ayaa sidoo kale diiradda lagu saari doonaa arrimaha danaha wadajirka ah, gaar ahaan xoojinta amniga gobolka, horumarinta iskaashiga dhaqaale, fududeynta isu socodka shacabka labada dal iyo sidii loo sii horumarin lahaa xiriirka qotada dheer ee ku dhisan derisnimo iyo walaaltinimo.
Soomaaliya iyo Jabuuti ayaa leh xiriir gaar ah oo ku saleysan taariikh, dhaqan iyo is-dhexgal bulsho oo soo jireen ah. Labada dal ayaa marar badan iska kaashaday arrimaha muhiimka u ah gobolka Geeska Afrika, iyagoo ka shaqeeya nabadda, xasilloonida iyo horumarka.
Booqashada Madaxweyne Xasan Sheekh Maxamuud ee Jabuuti waxay sidoo kale muujineysaa sida ay muhiim ugu tahay dowladda Soomaaliya xoojinta xiriirka ay la leedahay dalalka deriska ah iyo saaxiibada gobolka, iyadoo la raadinayo fursado cusub oo lagu horumarin karo iskaashiga labada dhinac.
Munaasabadda 49-guurada xorriyadda Jabuuti ayaa noqon doonta fursad ay madaxda gobolka ku muujinayaan taageerada iyo saaxiibtinimada ay la leeyihiin shacabka iyo dowladda Jabuuti, iyadoo Madaxweyne Xasan Sheekh uu Soomaaliya uga matalayo munaasabadda qaran ee taariikhiga ah.
